LAOAG CITY – Nagpalagip ti Department of Trade and Industry (DTI) iti publiko a liklikan ti aglako wenno gumatang kadagiti Christmas lights a substandard.
Segun ken ni DTI-Provincial Director Amelia Galvez, regular nga imonitor ti opisina da dagiti Christmas lights, nangruna iti panawen ti paskua, tapno masigurado a pumasa dagitoy iti required standards ti Philippine National Standards wenno PNS.
Inbatad na a para kadagiti imported a Christmas lights, masapul a makita ti Imported Commodity Clearance wenno ICC mark, a mangipakita a nasurot amin dagiti produkto iti proseso ti panangkita ti kalidad da.
Kunana a napateg daytoy a monitoring gapu ta dagiti Christmas lights ket maisaksak iti kuriente, isut gapuna a no substandard dagitoy ket mabalin a mangitunda iti peligro wenno pangrugyan ti uram.
Inlawlawag pay ni Galvez a no adda makita da a saan a pumasa iti standards, mabalin a kumpiskaren ti Department of Trade and Industry dagitoy ken ikkan ti notice of violation dagiti aglaklako.
Kabayatanna, kuna a mangrugi intono bigat a bolan ti Oktubre ket rugianen ti nasao nga opisina ti regular a monitoring kadagiti Noche Buena products pakairamanan dagiti Christmas lights.
