LAOAG CITY – Inbatad ni Ms. Nikki Althea Pambid, maysa kadagiti nakipagpaset iti insayangkat a programa ti Department of Trade and Industry a Youth Entrepreneurship Program para kadagiti agkalikagum nga agnegosio nga ado dagiti naipaay a sursuro kadakuada kabayatan ti pannakipagpasetda iti nasao a programa.
Kinunana a babaen iti nagbalin a programa ti ahensia, nasursuanda ti epektibo a panagbalin a negosiante ken no kasano ti mangbukel ti solusion iti maysa a problema a sangsangoen ti maysa a negosio.
Inbatadna a malaksid kadagiti sursuro a naamoanda ket adu dagiti naamaammona a sabali a tao, no sadinno tunggal maysa kadagitoy ket ibilangna a naggapoan dagiti nagduduma a sursuro a mabalinna nga iyaplikar kas maysa nga estudiante ken kas maysa nga agkalikagum nga agbalin negosiante iti masangoanan.
Inpettengna a kas maysa nga estudiante ti AgriBusiness, dakkel ti nagbalin a tulongna daytoy kenkuana gaputa nasursuruanna ti umno a panangiprisintar dagiti business proposal-da, no sadinno babaen ti nakipagpartisiparanda a programa ket pimmigsa ti pakinakemna a mangiprisintar dagiti proposal-da.
Kabayatanna, ginutigot ni Pambid dagiti kapadana nga estudiante ken kadagiti agkalikagum nga agnegosio ti saanda a pangdudua a makipaset kadagitoy a klase a programa gaputa ditoy ket ado dagiti mabalin a maamoan ken masursuro a mabalinto a maiyaplikar kadagiti bukoddanto a negosio.
