LAOAG CITY – Narekobre dagiti otoridad ti agarup agdagup ti P3 million a mapapati a naipuslit a sigarilyo iti Barangay Tacub, Pindolonan, Marantao, Lanao del Sur idi kalman, Nobiembre 7, 2026.
Narekobre dagiti kontrabando kalpasan a nakaawat ti impormasion ti Marantao Municipal Police Station (MPS) manipud kadagiti opisial ti barangay mainaig kadagiti sumagmamano a karton nga inbati dagiti saan pay a nabigbig nga indibidual.
Gapu iti daytoy, insigida a nagresponde dagiti kameng ti Marantao MPS, kaduada ti Provincial Special Operations Group (PSOG) ti Lanao del Sur Police Provincial Office (LDSPPO), no sadinno balligi ti pannakarekobreda kadagiti nasao a kontrabando.
Kabayatanna, iti agdama, addan iti kustodiar ti Marantao MPS dagiti nakumpiskar a sigarilyo para iti dokumentasion ken ti naikeddeng a turnover-na iti Bureau of Customs (BOC) para iti umiso a disposision.
