LAOAG CITY – Inrakurak ni Bombo International News Correspondent Manny Pascua iti Hawaii nga adon dagiti nadismaya iti administrasyon ni US President Donald Trump kalpasan a ngimmato amin a presyo dagiti magatgatang, karaman ditoyen dagiti produkto a petrolyo.
Segun ken ni Pascua, sakbay iti Midterm elections iti Estados Unidos ket nangipaay ni Elon Musk ti minilyon a kwarta tapno suportaran dagiti kandidato ni President Trump.
Nupay kasta, kuna ni Manuel nga uray ti kabaknangan a tao iti lubong ti mangipaay ti suporta kadagiti kandidato ni Trump ket awan ti serbina gapu ta saan nga isu ti pagibasaran dagiti tattao iti Amerika.
Inpakaammo ni Manuel nga adon dagiti dati a supporters ni Trump ti immakar iti democrats gapu iti pannakadismaya da kadagiti pagalagadan nga ipatpatungpal ti agdama a presidente ti Amerika, no sadinno nga inpagarop da idi a lumag-an ti panagbiag da, ngem kabaliktaran ti napasamak.
Mainaig iti daytoy, inlawlawag ni Pascua a dagiti mabotosan iti Midterm Elections ket iti kina-kongresista, gobernador, bise gobernador, ken dagiti kameng ti konseho iti nagduduma nga estado iti intero nga Amerika.
Kabayatanna, kuna ni Pascua a no bilang ad-ado dagiti mangabak a democrats iti Midterm Elections, possible a maiyuswat ti agsasaruno nga imbestigasyon kontra iti agdama nga administrasyon.
