LAOAG CITY – Inbatad ti kampo ni Senador Bato Dela Rosa a maibilang kas panang-ipit ti P50-million a gunguna manipud iti gobierno ti siasinnoman ti makaitudo iti paglemlemmengan ti Senador.
Kinunana a kasta met ti inyetnag ti Philippine National Police (PNP) a maysa a lawas nga ‘ultimatum’ para iti boluntario a panagparang ti senador kadagiti otoridad ket maibilang kas panang-ipit iti nasao nga agpanpanday linteg.
Malaksid iti daytoy, kinunana a mabalin a maaramat ti nasao nga ultimatum kas paset ti ‘political circus’ ti gobierno tapno mailimed dagiti dadduma pay a problema ti pagilian.
Immunan iti daytoy, inanunsio ni Department of Interior and Local Government (DILG) Sec. Jonvic Remulla ti ‘50 million pesos bounty’ kontra iti senador kageddan ti panangiyetnag ti Philippine National Police (PNP) ti maysa a lawas nga ultimatum para iti panagparang ni Senador Bato Dela Rosa.
Maipalagip a sumangsango ni Sen. Bato Dela Rosa iti ‘warrant of arrest’ ti International Criminal Court gapu iti pannakairamanna iti implementasion ti war on drugs ni dati a Presidente Rodrigo Duterte.
