Nakairekord ti Department of Agriculture (DA) ti sumuruk-kumurang a 20% a panagngato ti presyo ti sumagmamano a nateng no ikumpara iti napalabas a lawas kabayatan nga umas-asideg ti paskua.
Segun ken ni Department of Agriculture Assistant Secretary Genevieve Velicaria-Guevarra, karaman kadagiti produkto a ngimmina ket ti tarong, kamatis, kalamansi ken dadduma pay, karaman ti sumagmamano nga high-value crops kas ti carrots ken repolyo.
Inlawlawag ti opisyal a naipagagangay a mapasaran ti kastoy a panaggaraw ti presyo depende iti panawen ken supplay dagiti agricultural products.
Iti baet ti panagngato ti presyo ti sumagmamano a nateng, inpasigurado ni Velicaria-Guevarra a nagtalinaed a natalged ti presyo ti kaadoan kadagiti produkto pang-agrikultura.
