Inpaiman ti Department of Agriculture ti maysa a rice processing facility nga aggatad ti P65.6 million iti farmers’ cooperative iti Nueva Ecija.
Ti naisayangkat a turn-over dagiti pasilidad iti Talabutab Norte Primary Multipurpose Cooperative ket kas paset ti Rice Competitiveness Enhancement Fund (RCEF) Mechanization Program nga inatendaran ni Agriculture Undersecretary for Rice Industry Development Christopher Morales ken PHilMech Director IV Dr. Dionisio Alvindia.
Basar iti Department of Agriculture, ti investment ket nangipaay ti integrated rice milling ken drying facilities kadagiti mannalon iti Nueva Ecija a manamnama a mangpababa iti panag-dependarda iti commercial processing facilities.
Karaman ti rice processing facilities ti multi-stage rice mill a mabalin a mangproseso ti dua agingga tallo a tonelada iti kada oras ken aggatad ti P54.7 million.
Addaan pay daytoy a rice mill ti pre-cleaning, de-stoning, hulling, polishing, grading, ken color-sorting equipment.
Innayonna pay nga addaan pay daytoy ti tallo a recirculating-type mechanical dryers nga aggatad ti P10.88 million a mabalin a mangpamaga ti 24 a tonelda iti kada batch.
