Manarimaan ti panagsagsagana iti ili ti Sarrat para iti pannakaisayangkat iti Drug-Cleared Municipality evaluation ditoy probinsia.
Daytoy ti inpakaammo ni SAO IV Bismarck Bengwayan, Acting Public Information Officer ti Philippine Drug Enforcement Agency PDEA Region 1.
Segun kenkuna a nakompleto ti lokal a gobierno ti nadakamat nga ili ti dua nga aldaw a training idi Nobiembre 3 agingga 4 ita a tawen, kas paset iti panagsaganada tapno opisial a mabigbig a drug-cleared municipality.
Iti nasai a training, naiwayat daytoy iti Old Municipal Building ken inatendaran dagiti opisial manipud iti amin a 24 a barangay iti ili.
Gagem ti aktibidad a papigsaen ti laing ken kabaelan dagiti lider ti barangay a mangprebentar ken panagsungbat ti iligal nga aktibidad ti droga iti bukodda a komunidad.
Mainaig iti daytoy, inbatad ni Mayor Ralph Conrad F. Medrano iti kinapateg ti akem dagiti barangay a mapagbalin a natalged ken drug-free municipality iti ili ti Sarrat.
Ti nadakamat a training ket naisayangkat iti babaen ti tulong ti Philippine Drug Enforcement Agency (PDEA) Region 1 ken ti Ilocos Norte Provincial Office.
Kabayatanna, amin a 24 a Barangay Anti-Drug Abuse Councils (BADACs) ket nangipresentar ti planoda no kasano da iraman ti komunidadda kontra iti iligal a droga.
Dagitoy nga aktibidad ket maysa kadagiti requirements iti ili para iti dandani nga evaluation iti Regional Oversight Committee on Barangay Drug Clearing Program inton Nobiembre 17, 2026.
No man makapasa iti evaluation ti ili, ket daytoy ti mangipasimudaag a dandani a magun-od ti kalikagumda nga agbalin a Drug-Cleared Municipality.
