Kalikagum ti Department of Trade and Industry (DTI) – Ilocos Norte a pagbalinen a modernisado ti proseso ti panagaramid iti asin kadagiti lokal a pagaramidan ditoy probinsia babaen iti panangipaay dagiti moderno a ramit para iti produksion ti asin.
Segun ken ni Department of Trade and Industry (DTI) Ilocos Norte Director Amelia Galvez, kalikagum ti opisinada a mapasayaat ti kadawyan a wagas ti panagaramid iti asin babaen iti panangusar kadagiti modernized salt-making equipment tapno nalaklaka ken mapaalisto ti proseso iti produksion.
Iti agdama, nangipatulod ti nadakmat nga ahensia ti tulongda kadagiti ili nga agararamid iti asin, kas ti Pagudpud, Burgos, Badoc, Currimao ken Paoay.
Maysa kadagitoy ket ti Shared Service Facility a nainstolar diay Badoc a naipaay iti grupo ti salt makers a Pagsanahan Norte, no sadinno naipaay ti moderno a ramit para iti panagaramid iti asin.
Kabayatanna, pinagkaysa met ti Department of Trade and Industry (DTI) dagiti salt makers manipud Currimao ken Paoay tapno maorganisarda kas maysa nga asosasion ken mapigsa ti panagtitinulongda.
Inlawlawag ni Director Amelia Galvez a no maaddaanda ti umdas a pondo ken resources, kalikagumda pay a mangipaay dagiti pasilidad ken modernized salt-making equipment kadagiti dadduma pay a grupo tapno mapatalinaed a napintas ken ngumato ti produksion ti asin ditiy pagilian.
