LAOAG CITY – Inbatad ni Pol. Capt. Kester Arellano iti Philippine National Police iti ili ti Nueva Era a sakbay ti napasamak a pammaltog iti ili ti Nueva Era ket naamoan nga adda susik iti nagbaetan ti suspek ken ti biktima.
Basar iti imbestigasion, agbarkada dagiti maseknan ken immunan a nagsango ken nagsarita ti suspek ken ti biktima iti Barangay Uguis iti nadakamat nga ili, maysa a lawas sakbay ti insidente ti pammaltog.
Naamoan nga inubor, binato ken inkagumaan ti suspek a serken ti uneg ti pagtaengan ti biktima no sadinno ket nai-report ti isyu iti polis ken idinto a nagsarita ken nagpinnakawan dagiti maseknan.
Inbatad ni Arellano nga arig kasla naapeloan wenno adda saan a nakursunadaan ti suspek a garaw ti biktima a nangitunda iti pammaltog.
Segun kenkuana a fatal shot iti barrukong ken babaen ti kilikilina ti nasagaba ti biktima kabayatan a ti nobia ti biktima ket natamaan iti paset ti sakana ken adda daplis iti buksitna a basar iti medico legal.
Ti nausar a paltog ket ginatang ti suspek manipud iti Baguio City kabayatan ti panagtrabahona iti lugar.
Kabayatanna, napilaanen ti kaso ti suspek babaen ti inquest proceeding ken sumangsango daytoy ti kaso a murder ken frustrated murder.
