LAOAG CITY – Agtultuloy ti panangipatungpal ti psychological first-aid ti Department of Education para kadagiti mangisursuro ken estudiante a naapektaran ti insidente ti pammaltog iti Banga, South Cotabato.
Segun ken ni Department of Education Secretary Sonny Angara, nakapasar ti nakaro a trauma ti sumagmamano a mangisursuro ken estudiante gapu iti nakita a kinaranggas isu posible a saan da pay kabaelan nga agsubli iti klase.
Inpasigurado ti sekretario a nakapukos ti ahensia iti seguridad ti intero a pagadalan kagiddan dagiti inisiatibo a maisubli iti normal a situasion para iti amin a naapektaran a sektor.
Pakairamanan kadagiti konkreto nga addang ti ahensia ti panangiyuswat ti online school safety tapno surwan dagiti ubbing ken nagannak ti insigida a pannakaammo no adda problema dagiti estudiante.
Inbatadna pay a kadagiti naglabas nga insidente ti kinaranggas kadagiti pagadalan, dagiti maseknan a suspek ket agtawen ti 13 agingga 15 nga emosional ken vulnerable unay, isu nga agkasapulan ti naiget a panagtarabay ken atension.
