LAOAG CITY – Nakigtot ken napabutngan dagiti rescuers idiay Thailand kalpasan ti kellaat a panagbangon ti maysa a mapapati a natay nga aso a nirespondeanda iti likod ti truck.

Mainaig iti daytoy, nag-viral ti mismo a video iti maysa a social media application no sadinno nga immuna a nakita iti panangilugan da iti mapapati a natay nga aso a nakabungon iti puraw nga ules.

Kalpasan iti daytoy, kellaat a bimmangon ti aso kabayatan ti panagbiahe ti truck nga isu ti nangitunda ti panagbuteng dagiti rescuers.

Segun iti maysa volunteer a ni Theera Phuengphat iti Kamphaeng Phet Khao Phap Rescue Association, maysa a residente ti nagkiddaw iti grupo da a mangikkat iti natay nga aso iti sango iti pagtaengan ken ikali iti sabali a lugar.

Nakita da ti nadakamat nga aso nga awanen ti biagna isut gapuna a binungon da daytoy ken inlugan iti truck.

Kalpasan iti lima a minuto, kellaat a nagbiag manen a bimmangon iti aso ken arigna nasdaaw iti ayan na, ken limmagto iti truck ken nagtaray.