LAOAG CITY – Naideklarar ti flood disaster iti intero a Bangkok kalpasan ti pannakapasarda ti 48 nga oras a napigsa a panagtudo a nangitunda ti panaglayus kadagiti pagtaengan ken kalkalsada.
Suumurok 300 a millimeters a tudo ti nairekord kadagiti sumagmamano a lugar manipud idi Huebes ti aldaw agingga iti Sabado ti bigat.
Mainaig iti daytoy, indeklarar ti disaster area ti Bangkok Metropolitan Administration ti amin a 50 a distrito ti kabisera.
Inbatad ni Bangkok Governor a ni Chadchart Sittipunt nga stabilized-en ti sitwasion.
Nupay kasta, no awanen ti sumaruno a panagtudona, umabot iti dua agingga iti tallo nga aldaw sakbay a maawan dagiti naummong a danum kadagiti kalkalsada.
Umabot iti paga-siket ti kauneg ti danum kadagiti sumagmamano a lugar a rason ti pannakailemlem dagiti sumagmamano a lugan iti nasao a layus.
Iti baet daytoy, agarup 980 nga indibidual ti agtaltalinaed kadagiti evacuation shelters, bayat a 36 a bedridden patients met ti naiyakar kadagiti ospital.
Kabayatanna, manipud Setiembre 1 agingga 25, nakairekord ti Bangkok ti 487 millimeters a tudo, nangatngato kumparar iti average a 269 millimeters iti kapadana met laeng a panawen manipud idi tawen 1991 agingga 2020.
