LAOAG CITY – Kissayan ti Thailand iti 30 nga aldaw ti visa-free stay para kadagiti turista manipud iti sumurok 90 a pagilian ken teritorio a mangrugi inton Setiembre 15, 2026.
Basar iti Department of Consular Affairs iti Thailand, paset daytoy iti panagbaliw iti visa exemption ken Visa on Arrival schemes ti pagilian.
Pakairamanan dagiti maapektaran a pagilian ti 30-day visa-free policy ket ti China, United States ken 27 a pagilian iti European Union.
Iti agdama a pagalagadan, mabalin nga agtalinaed agingga 60 nga aldaw iti Thailand nga awan visa dagiti turista manipud iti sumurok 90 a pagilian ken teritorio.
Segun iti Thai government a pakairamanan ti gagem ti panagbaliw ti panaglapped iti panag-abuso iti visa system ken panagsungbat kadagiti isyu nga adda pakainaigan kadagiti foreigner a maseknan iti krimen iti pagilian kas dagiti kaso ti panaglabsing mainaig iti droga, human trafficking ken panangmanehar ti sumagmamano a negosio nga awan permit.
Nupay kasta, saan amin ket kissayan ti visa-free stay. Maipaayan ti agingga 90 nga aldaw a visa-free stay dagiti turista manipud Peru, Brazil ken South Korea, manipud iti dati a 60 nga aldaw.
Mabalin nga ag-apply dagiti turista para iti maysa nga extension stay ngem nakadepende daytoy ti panangtingiting ken panagaprubar ti immigration officer.
Basar iti kaudian a datos ti Thai authorities, umaboten iti 20.9 million ti foreign tourist arrivals iti Thailand manipud Enero agingga iti agdama kabayatan a nababbaba daytoy iti tallo a porsiento kumparar iti kapada a panawen idi 2025.
Naikeddeng inton Setiembre 15, 2026 ti pannakarugi dagiti baro a visa measures.
