LAOAG CITY – Naisalakan ti amin nga 44 nga ubbing kalpasan a pinaltupaltugan ti maysa a pulis ti asawana a mangisursuro iti maysa a kindergarten idiay Chonburi province, Thailand.
Basar kadagiti otoridad, naisalakan dagiti ubbing kaduada dagiti tallo a mangisursuro ken tallo nga school staff kalpasan ti insidente iti Nong Pla Lai Municipal Kindergarten iti Bang Lamung district.
Basar iti imbestigasion ti AFP, dimteng iti pagadalan ti suspek a maysa a pulis ken kinasaritana ti asawana sakbayna daytoy a pinaltugan. saan a naimatangan dagiti ubbing ti pammaltog gapu ta napasamak ti insidente iti ruar ti classroom.
Kalpasan ti insidente, nagawid ti suspek iti pagtaenganda no sadinno ket ditoy daytoy a naarestar dagiti otoridad.
Kabayatanna, binilin ti gobernadorda ti temporario a pannakaipaserra ti kindergarten ken pannakaiwayat ti psychological support para kadagiti ubbing ken staff a naapektaran ti insidente.
Saan pay a masinunuo ti motibo ti nasao a pammaltog.
