Inyarig ti Malacañang ken ni “Lola Basyang” ni Vice President Sara Duterte kalpasan nga inrakurak ti kampo na maipanggep ti maipagarop a plano a kanselaren ti 2028 national elections.

Segun ken ni Palace Press Officer Undersecretary Claire Castro, arigna agar-aramid laeng kadagiti fantasy stories ti kampo ti Bise Presidente.

Inrakurak daytoy ti opisyal kalpasan nga inrakurak ni Atty. Paolo Panelo Jr., ti pannakangiwat ni Duterte, a nakaawat ti maipagarop nga impormasyon ti Bise Presidente mainaaig iti plano a saan a panangituloy ti eleksyon intono 2028.

Kuna ni Panelo, a rumrumuar nga aggapo a mismo iti kamara de representantes dagiti isyu maipanggep ti maaw-awagan a “no-election” wenno “no-el” scenario.

Nupay kasta, naglikudan dagiti agpanpanday linteg iti kamara de representantes nga adda ti maiwaywayat a panagsasarita maipanggep iti pannakaitantan wenno panangkanselar ti 2028 elections.

Inpetteng met ni Castro a makumikum ni Presidente Ferdinand Marcos Jr. iti panangipatungpl kadagiti trabaho na.

Ginutigot pay ti opisyal ti kampo ni Duterte nga imbes nga agiwaras kadagiti saan nga umiso nga impormasyon ket sungbatan da lattan dagiti alegasyon maipanggep kadagiti maipagarop a nakalemmeng a kinabaknang ti bise presidente ken ti pamilya na, nga adda ti pakainaigan ti agtultuloy nga impeachment trial.

Iti agdama, awan pay ti naidatag nga umdas nga ebidensiya iti publiko a mangipaneknek iti maibgbaga a plano a kanselaren ti 2028 national elections.