LAOAG CITY -Ginutigot ti Malacañang dagiti ahensia ti gobierno ti simple a panangselebrarda ti Christmas parties kas paset ti agtultuloy nga addang iti panagtipid ti gobierno iti baet ti manamnama nga epekto ti El Niño intono sumaruno a tawen.
Basar iti Palasyo, saanda a mangiruar ti baro a pammilin kadagiti ahensia ngem kunada a liklikan ti nagarbo a panagselebrar gapu ta ado dagiti problema a kasapolan ti pondo ken atension ti gobierno.
Mainaig iti daytoy, imbilin ti Presidente Ferdinand Marcos Jr. dagiti ahensia ken lokal a gobierno a siguradoen nga umdas ti suplay ti danom, taraon, ken kuryente, kasta payen ti proteksion iti panggedan ken salun-at ti publiko.
Imbilin na pay dagiti ahensia nga ammoen dagiti lugar a napeggad iti kinakurang ti danom ken nakaro nga init tapno umuna ti panangilatang ti tulong ken ramit.
Kabayatanna, nakasagana ti National Irrigation Administration a mangipaay ti mobile solar-powered irrigation pumps kadagiti mannalon iti Region III, a manamnama a karaman kadagiti nakaro a maapektaran.
