Agtultuloy ti panangpalawa ti lokal a gobierno iti ili ti Banna ti S-H-I-E-L-D wenno Strengthening Human Papilloma Virus Immunization towards Elimination through Leadership Development kontra iti Cervical Cancer Program.

Ti nasao a programa ket nakatutok iti pananglapped iti cervical cancer ken dadduma pay a sakit nga adda ti pakainaigan iti Human Papilloma virus wenno HPV.

Segun kenni Mayor Mary Chrislyn C. Abadilla iti ili ti Banna, nairugi ti programa idi 2022 babaen iti panagbakuna kadagiti ubbing a babbai nga agtawen ti 9 agingga iti 14.

Kuna na nga ita a tawen ket ad-adda pay a pinalawa da ti programa tapno mairaman met dagiti ubbing a lallaki a mabakunaan.

Maipalagip a ti programa ket pormal a naisayangkat idi November 6, kas paset ti People’s Day iti nasao nga ili, no sadinno nga umabot iti 176 dagiti nabakunaan.

Inlawlawag ni Abadilla a kalpasan a mabakunaan dagiti ubbing nga agtawen ti 9 agingga iti 14 ket sumaruno a maipatungpal ti catch-up vaccination para kadagiti agtawen iti 15 agingga iti 17, agingga a madanon da dagiti agtawen iti 26 agpababa.

Iti agdama, addan iti 822 a target a mabakunaan, a pakairamanan dagiti ubbing a lallaki nga agtawen ti 9 agingga iti 14 manipud kadagiti pagadalan iti iti ili ti Banna, kasta met dagiti out-of-school youth ken dagiti adda iti sabali nga ili ngem residente iti iti ili ti Banna.

Innayon ni Mayor Abadilla a paset pay ti programa ti Purok Kalusugan Program, a mangidanon kadagiti serbisio iti salun-at babaen iti panagbisita kadagiti barangay.