Inbatad ni Sangguniang Bayan Member Eduard T. Mendoza, Chairperson ti Committee on Health iti ili ti Marcos, ti naiget a panagsagsagana ti lokal a gobierno tapno masigurado ti kinatalged ti salun-at dagiti umili gapu iti kinabara ti panawen nga epekto ti El Niño.
Segun kenkuana, napagsasaritaan dan kadagiti opisial ti barangay a masapol a pakaammoan da dagiti kabarangayan da maipanggep kadagiti rumbeng nga aramiden tapno maliklikan dagiti sakit ken aniaman a problema iti salun-at nga itunda ti nabara a panawen.
Inpaganetget na ti kinapateg ti naan-anay a panagsagana aglalo iti possible a panagkurang wenno panagpukaw ti supply ti danom kadagiti nagduduma a pasilidad kas iti ospital, pagadalan ken dadduma pay.
Mainaig iti daytoy, nagpanawagan kadagiti umili, aglalo kadagiti ubbing, nataengan ken addaan iti sakit a masapol a salwadan ti salun-at babaen ti panagtalinaed iti uneg ti balay no awan ti napateg nga aramiden iti ruwar.
Innayon na a kas chairperson ti Committee on Health, inpasigurado na a nakasagana ti lokal a gobierno a mangipaay iti tulong kadagiti umili, aglalo kadagiti agkasapulan ti agas ken dadduma pay a serbisio para iti salun-at.
