Naduktalan a pito iti kada 10 a pannakatay ti Pilipino ket gapu iti noncommunicable diseases a mainaig iti saan a nasalun-at a panagbiag.
Segun iti Department of Health (DOH), karaman kadagiti naduktalan a makaitunda ti pannakatay ket ti panagusar ti tabako no sadinno a nasurok a 95,000 ti matmatay iti kada tawen, idinto a ti nakaro a panaginom ti arak ket nasurok a 27,000.
Nasurok nga 4,000 ti matmatay met iti kada tawen gapu iti nangato a panagkonsumo ti asukar.
Gapu iti daytoy, ginutigot ti DOH ti Kongreso nga ipasa ti sin tax reform ken ipangato ti buwis dagiti sin product kas ti arak, tabako ken dagiti produkto nga addaan ti asukar tapno maliklikan dagiti pannakatay nga adda ti pakainaigan iti lifestyle.
Gagem ti Senate Bill No. 1074 a mangipataw ti nayun a buwis kadagiti sin product, karaman ti e-cigarettes.
