Agtultuloy ti panangipaay ti agingga iti ₱10,000 a tulong pinansyal ti Department of Social Welfare and Development (DSWD) kadagiti vendor ken mangmangged a napukawan ti pamastrekan gapu iti temporaryo a pannakapaserra dagiti negosyo da kas panagsagsagana iti ASEAN Summit iti Pasay City.
Segun ken ni DSWD spokesperson Assistant Secretary Irene Dumlao, mabalin ti agkiddaw ti ayuda dagiti apektado a saan pay a nakaawat ti tulong manipod iti gobierno.
Iti babaen ti Assistance to Individuals in Crisis Situations (AICS) program, mabalin a makaawat ti tulong pinansyal dagiti kwalipikado a benepisyaryo, depende iti panangtingiting dagiti social worker.
Immunan a naipaayan ti sag-₱10,000 ken family food packs ti 30 a vendor a naapektaran ti pannakapaiget iti operasyon dagiti negosyo iti lawlaw dagiti lugar a pakaiyuswatan ti summit.
Inpakaammo ni Dumlao a saan laeng nga agur-uray ti DSWD kadagiti umasideg nga agkiddaw ti tulong, no di ket agsursursur dagiti social worker kadwa da dagiti mangibagi ti lokal a gobierno tapno makita ken maamoan ti dadduma pay a napukawan ti pamastrekan.
Kabayatanna, nangilatang ti Department of Labor and Employment (DOLE) ti 10 nga aldaw a temporaryo a trabaho iti babaen ti TUPAD program para iti umuna nga 60 a mangmangged a naapektaran ti ASEAN preparations sipud idi Nobyembre 11.
