LAOAG CITY – Inanunsio ti Department of Budget and Management (DBM) ti manamnama a pannakaipay ti P5,000 cash gift para kadagiti empleado ti gobierno gobierno sakbay ti panagleppas ti tawen, kageddan ti umuna a sueldoda ita a Nobiembre.
Naiget a pinalagipan ti Department of Budget and Management (DBM) a masapol a suruten dagiti amin nga ahensia ti naikeddeng nga iskedyul ti panangipay iti daytoy a benepisio.
Iti maysa a rakurak, kinumpirmaran ti DBM ti panangiyallokarna ti P82.998 billion a pondo para iti Year-End Benefits dagiti kwalipikado a sibilyan, military ken uniformed personnel.
iti salinong ti DBM Budget Circular No. 2024-3, dagiti kwalipikado nga empleado ti gobierno ket addaanda ti karbengan a makaawat iti nasao a Bonus nga aggatad ti makabolan a sueldo agingga Oktubre 31, 2026, pakairamanan ti P5,000 cash gift sakbay nga agleppas ti tawen.
Segun ken ni Budget Secretary Kim Robert de Leon, naipaayen ti pondo a maawat dagiti empleado ti gobierno kadagiti sumagmamano nga ahensia, no sadinno masapol a masigurado a maawat dagiti empleado ti nasao a benepisio.
Kabayatanna, iti pakabukelan nga alokasion, P73.449 billion ti naiyallokar para iti Year-End Bonuses, kabayatan a P9.549 billion met para iti cash gifts.
Tapno agbalin a kwalipikado ti maysa nga empleado, masapol a nagserbi daytoy iti saan a bumaba ti uppat a bolan wenno 120 nga aldaw manipud Enero 1 agingga Oktubre 31, 2026.
Malaksid iti daytoy, masapol pay nga addada iti serbisio aginga iti Oktubre 31.
Karaman kadagiti kasapolan iti eligibility ket dagiti empleado nga adaan ti regular, contractual wenno casual posision iti national ken lokal a gobierno.
