LAOAG CITY – Inlawlawag ti Department of Education (DepEd) ken Department of Budget and Management (DBM) a saan a zero ti pondo para iti hiring ti public school teachers iti babaen ti nailungalong a 2027 national budget.
Basar iti dua nga ahensya, adda ti nailatang a P31.220 bilyon para iti panangpunno ti 64,530 authorized teaching positions kadagiti pampubliko a pagadalan.
Inaramid daytoy ti dua nga ahensya kalpasan dagiti report nga awan ti nailatang a pondo para iti baro a teacher hiring iti nailungalong a Fiscal Year 2027 budget.
Inpetteng ti Department of Education (DepEd) ken Department of Budget and Management, a saan a rumbeng nga awan ti pondo para iti teacher hiring ti kaawan ti maysa a naisina nga alokasyon para iti baro a posisyon.
Addan dagiti teaching position nga otorisadon ken addan ti maiyannatop a pondo para kadagitoy iti proposed budget.
Iti nalawlawa a nailungalong a budget ti Department of Education, naipalaon pay ti dakdakkel a Personnel Services allocation.
Basar iti Department of Budget and Management, adda ti P61.02 bilyon ti net increase iti Personnel Services funding ti DepEd para iti 2027, paset ti agarop P1-trilyon a budget para iti ahensya.
