LAOAG CITY – Posible nga agtestigo ni dati a Senador Richard Gordon iti pangangusig ti Sandiganbayan First Division iti Pharmally scandal inton Agosto.
Segun dagiti prosecutors, agtestigo ni Gordon inton sumaruno a panagdengngeg ti korte inton Agosto 3.
Iti agdama, tingtingitingen ti First Division ti graft case kontra ken ni dati a Department of Health (DOH) Secretary Francisco Duque III ken dati a Department of Budget and Management (DBM) Undersecretary Christopher Lloyd Lao mainaig ti maipagarup nga anomalia iti panangiyakar ti P41.6 billion a Covid-19 response funds.
Maipalagip nga idi tawen 2021, indauloan ni Senate Blue Ribbon Committee ni Gordon ti imbestigasion iti maipagarup a panangiyakar ti pondo manipud Department of Health a nagturong iti Procurement Service (PS) ti Department of Budget and Management (DBM).
Mainaig iti daytoy, matingiting met ti Pharmally Pharmaceutical Corp. kalpasan a makaala ti binillion a pisos a gatad ti kontrata iti gobierno para iti medical supplies idi pandemia.
Basar iti Office of the Ombudsman, ni Duque ken Lao “acted with evident bad faith or gross inexcusable negligence” iti kapasidadda kas mangidaulo ti Department of Health ken Procurement Service-Department of Budget and Management idi mapasamak ti panangiyakar ti pondo kadagiti ahensiada manipud idi Marso agingga Disiembre 2020.
