LAOAG CITY – Naiget ti addang nga ar-aramiden ti Philippine Statistics Authority iti panangtingiting ti birth records kadagiti senior citizen iti pagilian tapno masigurado a dagiti umno a benepisiario ti pakaitedan ti tulong pinansial ti gobierno.
Basar iti kaudian a report ti ahensia, balligi a naprosesoda ti umabot iti 29,546 nga aplikasion a dimmalan iti verification process-da.
Ti nasao nga addang ket direkta a nakaipalaon iti implementasion ti Republic Act No. 11982, maysa a linteg a mangibilbilin a maipaayan ti cash gift dagiti Pilipino nga agtawen ti 80, 85, 90 ken 95.
Inpetteng ni Philippine Statistics Authority Undersecretary ken National Statistician and Civil Registrar General Claire Dennis Mapa a gagem ti ad-adda a paigetan ti panangberipikar tapno maliklikan ti aniaman nga iregularidad wenno anomalya iti panangipaay ti pundo ken masigurado a lehitimo dagiti nakalista iti programa.
