Agtultuloy ti ar-aramiden dagiti nagduduma a barangay ditoy siudad ti Laoag dagiti wagas tapno mapagtalinaed ti kinatalged iti nagduduma a barangay iti siudad.
Segun ken Liga ng mga Barangay President Rbee Ablan a maysa kadagiti wagas nga ar-aramiden dagiti nagduduma a barangay ket iti panagronda ken panagtiliw dagiti mabigbig a walang nga aso wenno stray animals.
Mainaig iti daytoy, maysa kadagiti kangrunaan a barangay a mangipatpatungpal iti daytoy ket ti Barangay 55-B Salet ditoy siudad, babaen ti panangidaulo ni Barangay Chairman Fernando Baracao Jr.
Gapu iti daytoy, kinomendaran ni Ablan daytoy kalpasan dagiti insayangkatda nga stray animal control operations babaen ti pannakakikoordinar kadagiti Barangay Tanods ken dagiti deputized personnel manipud iti City Veterinary Office.
Daytoy nga inisiatibo ket nakapukos iti panangtiliw kadagiti walang nga aso ken dadduma pay nga agkaiwarang nga animal tapno maprebenteran ti posible nga aksidente iti kalsada, maprotehiran ti kinatalged ti publiko ken itandudo ti kinadalus ken kinaurnos a komunidad.
Tampok dagiti ar-aramidenda ti napateg nga akem dagiti barangay ken dagiti opisina ti siudad tapno solusionan dagiti problema ti kommunidad ken mangipatungpal dagiti addang a pagbenepisiaran dagiti residente ken ayup.
Iti babaen ti panangidaulo ni Mayor Hon. James Bryan Q. Alcid ken ti suporta ti Liga ng mga Barangay nga idauloan Hon. Roque Benjamin C. “Rbee” Ablan, agtultuloy ti pananggutigot ti gobierno siudad ti aktibo a partisipasion dagiti barangay iti panangipatakder ti nataltalged a komunidad.
Kabayatanna, nagpanawagan ti ni Liga ng mga Barangay President Ablan kadagiti agtagikua dagiti dingwena ti reponsibilidad ket rumbeng a mangrugi kadakuada tapno mapagtalinaed ti kinatalged dagiti nagduduma a komunidad ditoy siudad.
