Nagballaag ni Dr. Samantha Licudine, ti mangidadaulo iti City Veterinary Office ditoy ciudad ti Laoag kadagiti residente a mangibulbulos latta kadagiti taraken da aglalo ti aso a possible a mapatawan dagitoy ti multa a 25 ribo a pisos.
Inpetteng na nga ado paylaeng dagiti irresponsable a pet owners ditoy ciudad isut gapuna a no adda ti makagat dagiti taraken da ket rumbeng a sungbatan ken responsibilidad da a pabakunaan ti anti-rabies vaccine ti biktima.
Inpaganetget ni Licudine nga agur-uray da laeng kadagiti agreklamo gapu ta no saan a maidalan iti nasayaat a saritaan dagiti agtartaraken ket masapol a mapatawan dagitoyen ti multa.
Inpalagip pay ni Licudine a masapol a pabakunaan dagiti pet owners dagiti taraken da babaen ti panagturong da kadagiti vaccination sites iti panagturong da iti nagduduma a barangay ditoy ciudad ti Laoag, ken saan da a namnamaen nga agsursur da pay iti tunggal balay.
Mainaig iti daytoy, inbatad ni Licudine a malaksid iti panagrugit dagiti taraken nga aso iti kalsada ken arubayan, kasta pay ti panagkagat da kadagiti aglabas a tattao ket mangitunda pay dagitoy ti disgrasya.
