LAOAG CITY – Nagpalagip ti City Veterinary Office ditoy siudad ti Laoag kadagiti umili a maipawil ti panagparti ken panaglako ti karne ti aso kas paset ti pannakaipatungpal ti Animal Welfare Act.
Segun ken ni Dr. Samantha Licudine, mangidadaulo ti City Veterinary Office ditoy siudad ti Laoag nga awan ti naawatda a report ita a bulan a kaso maipanggep iti panagparti wenno panaglako ti karne ti aso.
Nupay kasta, kunana nga adda dagiti natiliw ken na-intercept idi naglabas a bulan babaen ti operasion dagiti otoridad.
Inbatad ni Dr. Licudine nga agtultuloy ti panangipatungpalda ti Animal Welfare ken binalakadanna dagiti aglabsing a mabalin a maipatawan iti dakdakkel a multa nga umabot iti sangagasut a ribo a pisos ken pannakaibalod a nakabasar iti kinadagsen ti paglabsingda iti linteg.
Kabayatanna, binalakadan ni Dr. Licudine ti publiko a saan a mangan iti karne ti aso gapu ta saan nga ammo no daytoy ket adda rabies wenno sabali pay a sakit a mabalin a mangitunda iti peggad iti salun-at dagiti tattao.
