LAOAG CITY – Kalikagum ni Dr. Samantha Licudine, mangidadaulo ti City Veterinary Office ditoy siudad ti Laoag a mangisayangkat ti lecture maipanggep iti panagbalin a responsable a pet owner kadagiti pagadalan.
Daytoy ket gapu ta adu pay laeng dagiti walang nga aso a matiltiliw iti grupoda kangrunaanna kadagiti coastal areas.
Nupay kasta, kunana nga adda metten ti panagsuratda ken ni Dr. Joan Corpuz, Schools Division Superintendent ti Department of Education ditoy siudad ti Laoag tapno makaisayangkatda ti lecture kadagiti pagadalan.
Inlawlawagna a daytoy nga aktibidad ket maammoan dagiti estudiante no kasano ti agbalin a responsable a pet owner, maipapan iti rabies ken kasano dagitoy a maprebentaran.
Malaksid iti daytoy, kuna ni Dr. Licudine a dagiti barangay officials wenno dagiti tanod ket addaandan ti bileg nga agtiliw kadagiti walang nga aso iti barangayda.
Innayonna a babaen iti nasao nga addang ket madisiplinada ti bukudda a barangay ken maprebentaran ti aniaman a mabalin a mapasamak kadagiti umili pakairamanan dagiti taraken nga aso.
