LAOAG CITY – Insayangkat ti Rotary Club Cluster 1A a pakairamanan dagiti Rotary Club manipud Bangued, Abra, Magsingal, Vigan, ken Narvacan, Ilocos Sur ti Project Aral iti pagadalan ti Cataban Elementary School iti siudad ti Laoag.
Ti Project Aral ket maysa a programa ti Rotary Club Cluster 1A a nangibunong ti 100 a libro, electric fan ken ti panangipaay ti tawa ken ridaw ti reading center ti nasao a pagadalan.
Pakairamanan ti nasao a programa ti pannakayuswat ti lecture mainaig iti bullying ken saving tips, eye ken health check up no sadinno adda pay obygyne iti nasao a programa.
Inbatad ni Deputy Assistant Governor ti Rotary Club Cluster 1A Julia Divina Martin a saan a daytoy ti immuna a daras a panagturongda iti nasao a pagadalan.
Malaksid iti daytoy, addan dagiti sumagmamano a programa nga insayangkatda a pakairamanan ti OTOL wenno One Tree One Learner no sadinno nagibunongda ti 150 a seedlings ti niyog, medal ken sertipikasion iti panagturposda, water filtration system tapno saandan a kasapulan ti gumatang ti inumenda ken dadduma pay.
Inbatadna a ti rason no apay napilida ti Cataban Elementary School ket gapu ti pannakakita ni Ms. Martin nga agtipon ti maysa a classroom ti dua nga agsabali a grade level.
Kabayatanna, ti Rotary Club ket maysa a non-profit ken non-government nga organisasion a rinugianan ti tallo nga agpagayam agingga dimur-as. Idinto a ti pondo nga us-usarenda kadagiti programa ken proyektoda ket manipud iti annual membership-da, sumagmamano nga income generating project ken donasion.
Kalikagumda nga ado pay ti matulonganda babaen kadagiti proyekto ken programada.
