LAOAG CITY – Indeklara dagiti aktibista a mangngalap a nagballigi ti fishing expedition a naisayangkat iti West Philippine Sea iti laksid ti panangipawil nga inpatungpal ti Beijing.
Ti “collective fishing” ket inorganisar ti grupo ti Pambansang Lakas ng Kilusang Mamamalakaya ng Pilipinas wenno PAMALAKAYA, manipud Mayo 30 agingga iti 31 kadagiti danum nga asideg iti Masinloc, Zambales, no sadinno a naiwayat daytoy tapno mangsuppiat iti uppat a bulan a panagkalap ti China iti sumagmamano a paset ti 200-nautical mile exclusive economic zone (EEZ) ti Pilipinas.
Daytoy ket namunganay kalpasan ti agtultuloy a panangsakop ti China iti dandani intero a paset ti West Philippine Sea, iti laksid nga imun-una a saan nga inkankano ti Permanent Court of Arbitration ti nine-dash line claim-da idi 2016.
Patta-patta nga agpaut ti fishing moratorium ti China iti West Philippine Sea agingga iti Setiembre 16.
Maialagip a ti direktiba ket immuna a sinubok ti Department of Foreign Affairs (DFA) ken ti Philippine Navy, a naibaba kalpasan nga imbilin ti Beijing ti coast guard-na a mangibalud kadagiti “trespassers” iti West Philippine Sea.
Ti Beijing ket mangkonkontrol kadagiti sumagmamano a paset iti uneg ti exclusive economic zone ti Filipinas a kas ti Bajo de Masinloc (Scarborough wenno Panatag Shoal).
Kabayatanna, basar iti patta-patta ti PAMALAKAYA, umaboten iti P223 bilion a balor ti pannakadadael ti Beijing iti West Philippines Sea.
