LAOAG CITY – Duapulo a barangay ditoy probinsia ti nabenepisyaran ti household composting kits babaen ti Environment and Natural Resources Office ti gobierno probinsial.
Segun ken ni Mr. Jogie Jimenez, Environmental Program Officer, dagiti composting kit ket mausar a pangipanan dagiti kitchen waste tapno makissayan ti epekto ti organic waste iti aglawlaw ken mapagbalin dagitoy a nutrient-rich fertilizer.
Kunana a daytoy ti maysa a wagas tapno ad-adda a maitandudo ti sustainable waste management ditoy probinsia.
Innayon ni Jimenez, pilot project daytoy a programa idi ti Brgy. Poblacion iti ili ti Burgos, idi isuna ti barangay chairman iti nadakamat a lugar.
Gapu ta napintas ti epekto na iti aglawlaw ket inadaptar daytoy ti gobierno probinsial nga isu ti maysa nga ikagkagumaan ni Gov. Cecilia Araneta-Marcos sipod pay idi bise gobernador daytoy.
Mainaig iti daytoy, naisuro kadagiti benepisiario dagiti nagduduma a teknik para iti napinpintas a composting project, naipaadal kadakuada ti importansya ti partisipasyon ti komunidad kadagiti initiatibo maipanggep ti aglawlaw.
