LAOAG CITY – Natay ti maysa a dati nga Overseas Filipino Worker kalpasan a napaltu-paltogan iti Barangay 5, Davila iti ili ti Pasuquin.
Nabigbig ti biktima a ni Jovencio Torres Taccuban, agtawen ti 65, naasawaan ken residente iti Sitio Purikawa Barangay 5, Davila iti ili ti Pasuquin.
Segun ken ni P/Maj. Sheryl Guzman, Hepe ti Pasuquin Municipal Police Station, kabayatan nga agisagsagana ti biktima para iti pang-rabii daytoy a taraon ket kellaat a pinaltogan ti sumagmamano a daras ti saan pay a nabigbig a suspek.
Inbatadna a nagsagaba ti tama ti paltog iti nagduduma a paset ti bagi ti biktima nga insigida a naitaray iti Gov. Roque B. Ablan Sr. Memorial Hospital ngem naideklarar a dead on arrival babaen ti attending physician.
Inlawlawagna a nakarekobre dagiti otoridad ti innem a fired cartridge cases ti calibre .45, maysa a fired bullet, maysa a deformed bullet ken maysa a metal jacket fragment iti nakapasamakan ti krimen.
Kunana nga agtultuloy ti imbestigasion dagiti otoridad maipanggep iti motibo iti pammaltog ken pakabigbigan ti suspek.
