LAOAG CITY – Natay ti driver ti motorsiklo a naidungpar iti poste ti streetlight iti Barangay Poblacion 2 iti ili ti Pasuquin.
Segun ken ni P/Maj. Sheryl Guzman, Hepe ti Pasuquin Municipal Police Station, ti driver ti motorsiklo ket maysa a mangngalap, agtawen ti 23, awanan asawa idinto a ti kinalubbonna ket kasinsinna nga agtawen ti 19, awanan asawa ken agpada a residente dagitoy iti Barangay Caruan iti ili ti Pasuquin.
Inbatadna a basar iti imbestigasionda, nakasarsaritada ti kinalubbon ti driver ti motorsiklo no sadinno a kunana kadakuada a naggapuda iti maysa a pagiinuman iti ili ti Bacarra ken agawid koma dagitoyen idi napasamak ti insidente.
Inlawlawagna a kabayatan a dumaldalyasat iti national highway dagiti nakalugan ti motorsiklo ket kellaat a napukawan ti kontrol ti manibela ti driver agingga a naidungparda iti poste ti streetlight.
Kunana nga agpada a saan a nakasuot ti protective helmet ti driver ken backride ti motorsiklo idi napasamak ti insidente.
Innayonna a basar kadagiti nakakita ti disgrasia ket napaspas ti taray dagiti nakalugan ti motorsiklo.
