LAOAG CITY – Manamnama ti pannakaiyawid dagiti 20 a kaprobinsyaan nga adda idiay Manila babaen ti Balik Probinsya Program ti Provincial Government of Ilocos Norte babaen ti Metro Ilocos Norte Council.
Segun kenni Atty. Nikki Pilar, Administrative Officer V iti nasao nga opisina, agarup 32 returning residents ti nakaawiden ditoy probinsya a naggapo idiay Manila ken Baguio.
Inbatad na a kangrunaan dagiti nasukon ket dagiti stranded students ken distressed workers.
Kunana nga apaman a nakasangpet dagiti returning residents ket dagus a naipan da kadagiti quarantine facilities.
Inlawlawag na a saan dan a dumalan iti rapid test gapo ta adda met ti naipakita da a health certificate a mangibagbaga a saan da a probable wenno suspect case ti COVID-19.
Naamoan nga itay malem ket nagbyahe ti bus a mapan mangsukon kadagiti 20 nga adda idiay Manila.
Iti agdama ket manarimaan ti pannakai-quarantine dagiti 12 a nasukon idiay Baguio idi Mayo 15 idinto a naglippasen ti quarantine dagiti immuna a 20 a naggapo idiay Manila.
Manamnama nga adu pay dagiti maiyawid a kaprobinsyaan intono sumaruno a lawas.
