LAOAG CITY – Maysa a batalyon a pulis manipud iti Camp Bagong Diwa ti inpatulod ti National Capital Region Police Office idiay Manila.
Daytoy ket para iti nayon a seguridad iti manamnama a panangiwayat ti tignay protesta kadagiti nagduduma a grupo kagiddan ti maika-40 nga anibersario ti EDSA People Power Revolution.
Karaman kadagiti naipatulod a pulis ket aggapu pay kadagiti kaparanget a probinsia nga agbantay iti posible a tignay protesta iti sumagmamano a paset ti Manila nangruna iti Mendiola.
Inpasigurado manen ti Manila Police District nga ipakat ti maximum tolerance kadagiti maiwayat a tignay protesta kas panangrespetar iti waya-waya a panangirakurak ken karebbengan dagiti tattao.
Nupay kasta, inpetteng manen ti Manila Police District a no adda ti mairaman iti panaglabsing ken kinaranggas ket ipatungpalda ti maiyallubog iti linteg.
