LAOAG CITY – Naiget a banbantayan ti National Capital Region Police Office (NCRPO) dagiti pampubliko a lugar ken kalsada iti Metro Manila a manamnama nga agbalin a sentro dagiti tignay-protesta ita nga aldaw ti Lunes, Setiembre 21 iti panaglagip iti maika-54 nga anibersario ti deklerasion ti Baras Militar wenno Martial Law.
Pakairamanan kadagiti kangrunaan nga innayon iti naiget a panagbantay ket ti dadduma a paset ti EDSA, Chino Roces Bridge (Mendiola), J.P. Laurel Street, Ayala Bridge ken dagiti pampubliko a lugar nga asideg iti Technological Institute of the Philippines (TIP) Manila, San Sebastian Church ken University of the East (UE).
Naamoan a sakbay ti nadakamat nga anibersario, personal nga indauloan ni National Capital Region Police Office (NCRPO) Officer-in-Charge Police Brigadier General Christopher Abrahano ti walkthrough ken ocular kadagiti kangrunaan a kalsada iti Manila tapno tingitingen ti seguridad ken dagiti ruta a posible a dalanan dagiti demonstrador.
Segun ken ni Gen. Abrahano, napateg ti nasapa nga inspeksion kadagiti nadakamat a protest sites tapno masigurado ti naurnos nga ayus ti trapiko ken ti pakabuklan a kinatalged ti publiko ken dagiti umili.
Nagballag ti heneral kadagiti naiwaras a kameng ti pulos nga agtalinaed nga alerto ngem naiget a respetaren ti karbengan dagiti umili iti nakappia a panagtitipon ken nawaya a panangibatad wenno panangipeksa ti nakem.
