LAOAG CITY – Pinasingkedan ni Ms. Perlita Cabello, mangidadaulo ti City Social Welfare and Development Office (CSWDO) a kompleto dagiti Child Development Center (CDC) iti amin a barangay ditoy siudad ti Laoag.
Namunganay daytoy kalpasan ti inrakurak ni Konsehal John Michael Fariñas nga adda dagiti barangay nga awan iti Child Development Center -na.
Segun ken ni Cabello, adda iti 92 a Child Development Center iti siudad, a mangipakpakita a tunggal barangay ket addaan iti bukodna a CDC para kadagiti ubbing.
Inlawlawagna pay nga adda dagiti barangay nga addaan ti nasursurok pay ngem maysa ti CDC-na, kas iti Barangay 1 ken Barangay 55-A nga addaan iti tallo a Child Development Center-na, kabayatan a dua met ti adda iti Barangay 55-B, Barangay 10 ken ti Barangay 23.
Innayon ni Ms. Cabello a saan a pudno dagiti umuna a naipakaammo nga iti Barangay 32-C, ken Brgy. Sta. Rosa ket awan ti Child Development Center-da.
Kabayatanna, inbatad ni Ms. Cabello a nangrugi daytoy a sistema manipud pay idi, agraman iti panangpasigurado ti CSWDO a maaddaan ti pagadalan ken panangtarabay dagiti ubbing iti tunggal barangay iti siudad.
