LAOAG CITY – Dimmalan ti 20 a Persons with Disability ditoy ciudad ti Laoag iti Computer Literary Training babaen iti Department of Information and Communications Technology.
Daytoy ti inpakaammo ni Mr. Christoper King Medina, Disability Affairs Officer 4 ti Persons with Disability Affairs Office ditoy ciudad.
Segun kenkuana, ti nasao a programa ket dakkel a tulong para kadagiti addaan ti rangkap ti bagi gapu ta naipaadal kadakuada no kasano nga usaren iti computer kas iti panagtype, panagedit ken dadduma pay.
Inbatad na a saan a linged a manmano laeng dagiti addaan ti rangkap ti bagi a makaammo no kasano nga usaren iti computer isut gapuna a nakibinnulig ti opisina da iti Department of Information and Communications Technology tapno masursurwan dagitoy.
Kunana a babaen iti programa ket naam-ammoda ti baro a teknolohiya a mabalin a mangpaalisto iti trabaho da.
Mainaig iti daytoy, kunana a no kasapolan da ti computer a pagsursurwan ket silulukat ti opisina da a mangipabulod.
Innayonna a kitkitaen pay ti ospina da babaen iti pannakibinnuligda iti Department of Information and Communications Technology no ania pay dagiti programa a mabalin maitulong kadagiti adda rangkap ti bagina pakairamanan dagita senior citizens tapno al-alisto da a maadaptar ti teknolohiya.
