LAOAG CITY – Mabalin nga usaren ni Presidente Ferdinand Marcos Jr. ti bileg daytoy a mangipatungpal ti price freeze iti langis no agtultuloy ti panagngato iti presio dagiti produkto a petrolyo.
Daytoy ti inpaganetget ni Senador Sherwin Gatchalian nangruna no ti Liquefied Petroleum Gas ket umabot iti P40 iti kada kilo a mabalin a ma-trigger ti Presidente tapno usarenna ti bileg a mangipatungpal ti price freeze kadagiti amin a petroleum products.
Inlawlawagna a ti Liquefied Petroleum Gas ket maysa a basic commodity ken no agtultuloy pay ti panagngato daytoy ket naruay a negosio ti maapektaran.
Iti babaen ti oil deregulation law, no nangideklarar ti state of national energy emergency, mabalin nga aramiden ti Presidente nga i-take-over ti oil facilities tapno maurnos ti suplay dagiti produkto a petrolyo kasta pay a mabalin nga i-take-over ti gobierno ti operasion pakairamanan ti panag-freeze iti presio.
Mamati ni Gatchalian a saan a nalidem nga usaren ti Presidente ti price-freeze aglalo no agtultuloy latta ti tension idiay Middle East.
