LAOAG CITY – Dimmalan iti tallo nga aldaw a training workshop dagiti 20 a tobacco growers, pakairamanan ti Rural Women ken dagiti dua nga agricultural extension workers ditoy siudad ti Laoag.
Ti nasao a training workshop ket maipanggep iti panagaramid ti hand-made paper ken dagiti nagduduma a novelty item a produkto manipud iti tabako.
Segun ken ni Engr. Shiela Opelac, mangidadaulo iti Agriculture Office ditoy siudad ti Laoag, babaen ti nasao nga aktibidad ket masursurwan a naimbag dagiti mannalon tapno ad-adda a mapadur-as dagiti value-added products manipud iti mula a tabako.
Kunana a mabalin daytoy a manglukat kadagiti baro nga oportunidad tapno adda ti nayun a pammastrekan dagiti tobacco growers.
Kabayatanna, inbatad ni Opelac a ti nasao a programa ket nagbibinnuligan ti lokal a gobierno ditoy siudad ti Laoag, City Agriculture Office ken ti National Tobacco Administration tapno maipakita ti agtultuloy a panangsuportarda iti pannakapapigsa iti kapasidad ken makaipaay ti kanayunan pay nga oportunidad para kadagiti mannalon.






