LAOAG CITY – Ballaigi ti naminsan manen a pannakaisayangkat ti Run After Contribution Evader wenno RACE ti Social Security System wenno SSS.
Segun ken ni Mr. Richard Raralio, Branch Head II ti nasao a pangopisinaan, naiyuswat ti dua a Run After Contribution Evader activity babaen iti pannakabukel ti dua a grupo dagiti empleado ti Social Security System a bimmisita kadagiti pasdek-negosio iti ili ti San Nicolas, Bacarra ken Vintar.
Inbatadna nga umabot iti 20 nga employers ti nabisitada ditoy Ilocos Norte nga addaan ti delinquent account wenno dagiti employers a saan a mangipapaay ti umiso a benepisio kadagiti empleado nga agpapaay kadakuada.
Kunana a daytoy metten ti maudi a pannakaisayangkat ti nasao nga aktibidad ita a tawen ngem impaganetgetna a maitultuloy daytoy iti sumaruno a tawen nangruna ket adu pay dagiti maimalmaldit iti record-da nga agsalsalungasing iti paglintegan nga ipatpatungpal ti Social Security System.
Inlawlawagna a dagiti maseknan a pasdek-negosio a nabisitada ket makaukkon ti Social Security System ti pakabuklan a 3,735,668.5 no amin dagitoy ket ag-comply wenno i-settle-da amin dagiti nagkurangan ti tunggal employer.
Mainaig iti daytoy, inlawlawag ni Atty. Blessilda Acosta, Branch Lawyer ti Social Security System ditoy siudad ti Laoag a no saanda nga iyasikaso dagiti papeles a kasapulan a maiyurnos iti uneg ti 15 nga aldaw ket otomatiko a maipasa dagiti dokumento dagitoy iti Prosecutor’s Office ken mabalinda a mapilaan ti kaso.
Kunana nga ibilang koma dagiti employers isuda kas maysa a pagayam a mangbalbalakad kadakuada ti umiso nga aramidenda sakbay a kumaro pay ti nagkuranganda nga obligasion kas maysa nga employer kadagiti empleadoda.
Mangnamnama ni Acosta nga amin kadagiti nabisitada ket sumurotda iti pakdaar ti Social Security System.
Kabayatanna, inpakaammo ni Mr. Ceasar Saludo, Vice President, Social Security System Luzon North Division nga adda ti dua nga employer ti mapilaan ti kaso gapu ta nakitada a saan dagitoy a nangted ti Social Security System contributions para kadagiti empleadoda.
Kamaudiananna, naammoan a dagiti nabisita a pasdek-negosio ket adda iti benneg ti food, construction, hospital, gasoline station ken dadduma pay.
