LAOAG CITY – Agtultuloy ti panangtingiting ni Presidente Ferdinand Marcos Jr. ti 2025 national budget sakbay a pirmaanna tapno maipasigurado a saan nga aglabsing iti Konstitusion.
Segun ken ni Executive Secretary Lucas Bersamin, kangrunaan nga ikonkonsiderar ti Presidente iti programming ken spending ti limitado a pagkaotan ti pundo.
Immunan nga inrakurak ni Presidential Communications Office Acting Secretary Cesar Chavez a mapirmaan inton Disiembre 30 kalpasan ti Rizal Day program idiay Manila ti General Appropriations Act.
Karaman kadagiti manarimaan ti pannakarebyuna iti 2025 National Budget ti naikissay a P10 billion iti Department of Education (DepEd) ken ti nakadakdakkel a budget a naipaay iti Department of Public Works and Highways (DPWH).
Inarisit pay ti Presidente ken dagiti economic manager dagiti nakasingit a proyekto iti General Appropriations Act nga awan iti orihinal a budget request ti Presidente.
Nagpalagip ni Sen. Juan Miguel Zubiri a nasken a matingiting a naimbag ti national budget gapu iti posible a panaglabsing iti Konstitusyion ken posible a makadanon daytoy a banag iti Korte Suprema.
Kabayatanna, naammoan a maitantan ti pannakaipatungpal dagiti nakalinya a proyekto ken programa no ideklara daytoy iti Korte Suprema a maikanniwas iti Konstitusion.
