LAOAG CITY – Inpannakkel ni Local Government Secretary Jonvic Remulla nga ad-adda nga epektibo ti kampania iti iligal a droga ni Presidente Ferdinand Marcos Jr. maidasig iti napalabas nga administrasion.
Inbatad ti sekretario a naruay ti natay iti war on drugs idi panawen ni dati a Presidente Rodrigo Duterte ngem saan latta a nagsardeng ti panagraira ti iligal a droga.
Inlawlawagna nga ita a panawen ni Presidente Marcos ket sumursurotda iti linteg ken awan ti aniaman nga extrajudicial killings.
Kunana a naiget pay ti panangarestar kadagiti adda iti likudan ti iligal a droga gapu iti panagtitinnulong ti kapulisan ken Philippine Drug Enforcement Agency.
