LAOAG CITY – Naipilan ti Department of Public Works and Highways (DPWH) ti kaso a malversation ken graft kontra iti 21 nga opisyal ti ahensya ken ti dua a contractors iti Office of the Ombudsman mainaig iti flood control projects iti La Union ken Davao Occidental nga agbalor ti P276-milyon a pisos.
Segun ken ni Department of Public Works and Highways Secretary Vince Dizon Basar, dagiti proyekto ket pakairamanan ti P96.5 million a balor ti ghost projects iti Davao Occidental ken ti dua a phases ti saan a nalpas a flood control projects iti La Union nga agbalor met ti P89.7 million iti tunggal maysa.
Inbatad ni Dizon a ti contractor ti proyekto idiay Davao Occidental ket ti St. Timothy Construction a kukua dagiti agasawa a Curlee ken Sarah Discaya, idinto a ti contractor ti proyekto iti La Union ket ti Silverwolves Construction.
Inpetteng ni Dizon a kayat a sawen daytoy ket amin a bidding kadagitoy a proyekto, kasta met ti pannakaimplementar ken panagbayad kadagiti kontratista ket napasamak iti level ti district engineering office.
Immunan nga inrakurak ni Ombudsman Jesus Crispin Remulla a mangiyuswat met ti Ombudsman ti imbestigasyon kontra ken ni Benguet Lone District Representative Eric Yap kas beneficial owner ti Silverwolves Construction ken ni Davao Occidental Rep. Claude Bautista gapu iti pannakairaman ti the ghost project iti hurisdiksyon na.
Ni Yap ket nagserbi kas House committee on Appropriations chairman manipod 2020 agingga iti 2022.
