LAOAG CITY – Nangipasa ti Sangguniang Bayan iti ili ti Sarrat ti maysa a gakat para iti pannakaipangato ti plete ti tricycle gapu iti panagngato ti presio dagiti produkto a petrolyo ditoy pagilian.
Segun ken ni Konsehal Esteban Agoy, Chairman ti Committee on Transportation, nakailanad iti nasao a gakat nga adda ti panagngato ti plete apaman nga adda met ti panagngato ti presio dagiti produkto a petrolyo.
Inbatadna a basar iti computation a surotenda ket sentimo laeng ti mainaynayon tapno saan met a madagsenan dagiti residente iti ili ti Sarrat.
Inlawlawagna a daytoy ti inaramidda nga addang kalpasan nga adda dagiti nagkiddaw ti tulong kadakuada manipud kadagiti tricycle drivers a marigatanen ti mano a lawasen nga oil price hike ken arig awanen ti mabati ti mapasadaandan.
Kunana a sakbay nga inpasada daytoy a gakat iti Sangguniang Bayan ket nangisayangkatda nga immuna ti public hearing ket ditoy nga immanamong dagiti nagatendar iti daytoy.
Iti agdama, inpakaammo ni Agoy nga umabot iti 20 a pisos ti regular fare iti ili ti Sarrat.
Innayonna a saan pay a naan-anay a maipatungpal daytoy gapu ta naipasa pay laeng ti nasao a gakat iti Sangguniang Panlalawigan ken maiyur-uray ti desisionda no aprobaranda wenno saan.
