LAOAG CITY – Umaboten ti uppat a barangay ti nairekord ti Municipal Disaster Risk Reduction and Management Office iti ili ti Sarrat a nalayus gapu pay laeng ti epekto ti Habagat.
Iti baet daytoy, impakaammo ni Mr. Marvin Ganal, mangidadaulo ti Municipal Disaster Risk Reduction and Management Office iti ili ti Sarrat a bayat ti agtultuloy a mapaspasaran a panagtudo ket natalged ken kontroladoda pay laeng ti mapaspasaran a panagtudo iti ili ti Sarrat.
Malaksid iti daytoy, inbatadna nga awan pay ti nairekordda a nagbakwit gapu ta ti panagpigsa ti tudo ken panaglayus ket insigida nga agayus daytoy apaman ti apagbiit a panagsarde-sardengna.
Innayonna nga awan pay ti naipadanon kadakuada a kaso ti panagreggaay ti daga iti kabanbantayan a paset ti ili ti Sarrat a masansan a makairekrekord ti paagreggay ti daga no madanoan ti panagtutudo.
Kabayatanna, bayat ti kinatalged ken kinakontrolado iti lugar, impasigurado ni Ganal ti agtultuloy a panagbantay ti opisinada kadagiti amin a lugar a posible a nakaro a maapektaran pay ti agtultuloy a panagtudo.
