LAOAG CITY – Kalikagom dagiti residente ti Brgy. 17 San Felipe iti ili ti Sarrat ti insigida a pannakaiyakar ti turong ti danom iti karayan iti Barangay 17 San Felipe iti ili ti Sarrat.
Segun ken ni Kapitan Christopher James, daytoy ket gapu iti kallabes nga epekto ti Habagat no sadinno a napasaran ti nakaro a panagtudo ken panagangin.
Inbatadna a gapu iti panagbaliw ti turong ti danom iti karayan, naawanan dagiti residente ti pagalaan ti danom ken uray dagiti danom iti bubon ken kulokol ket awanen ti maalada.
Inlawlawagna a no man awan ti maalada a danom ket insigida a nagtignay ti lokal a gobierno ken National Irrigation Administration (NIA) tapno masuplayan da ti danom.
Mainaig iti daytoy, apaman nga addan ti nagbalin da a kiddaw iti lokal a gobierno ket kalikagomda ti insigida a tignay daytoy.
Innayonna nga impasingked ti Environment and Natural Resources Office (MENRO) nga iti kabiitan a panawen ket rugianan dan iti pannaka-divert ti dati a turong ti danom iti karayan tapno maaddan da ti danom.
Iti baet daytoy, nagyamanan ni James iti probinsial ken lokal a gobierno iti araramiden da a tignay tapno maipaayanda ti suplay ti danom iti kabiitan a panawen.












