LAOAG CITY – Awan ti sayangen nga oras ti Gilas Pilipinas isut gapuna a dagus da a nagensayo apaman a nakasangpet da idiay  Malaysia.

Addan idiay Malaysia ti Gilas para iti panagsagsagana da iti Fifth Window ti FIBA Basketball World Cup Asian Qualifiers.

Kaadoan kadagiti Gilas players ket naggigiddan a nagturong iti Malaysia manipod iti Pilipinas a pakairamanan da Kai Sotto, Dwight Ramos, Kevin Quiambao, Scottie Thompson, Cjay Perez, Troy Rosario, Chris Newsome, ken Juan Gomez de Liano.

Kabayatanna, nagderetso met manipod iti Japan da AJ Edu, Mike Phillips, ken Quentin Millora-Brown.

Kadagiti sumarsaruno nga aldaw ket makipaset ni Beannie Boatwright gapu ta adda paylaeng ti sumagmamano a commitments na iti Chinese ballclub.

Mamati ni Gilas coach Tim Cone nga umdas ti innem nga aldaw a panagensayo da no sadinno a namnamaen na a makabisado ni Boatwright ti sistema ti ay-ayam.

Umuna a makasango ti Gilas ti Syria intono Nobyembre 27 idinto a ti Iran ket makalaban na intono Nobyembre 29.