Desidido ti National Union of Peoples’ Lawyers (NUPL) a mangipila ti kaso kontra kadagiti kameng ti pulisya a nangarestar iti sumagmamano a protesters.
Segun ken ni NUPL President Ephraim Cortez, nalawag a linabsing ti Philippine National Police ti karbengan ti tao iti panangarestar da kadagiti protesters.
Isagsagana dan dagiti kaso nga arbitrary detention ken panaglabsing iti Batas Pambansa 880 wenno Public Assembly Act of 1985.
Karaman pay nga ipila ti NUPL a kaso ti Republic Act 7438 aglalo ti right to counsel dagiti detainees.
Ti nasao nga addang ket kalpasan nga inarestar dagiti pulis ti nasurok a 200 a protesters a nangisayangkat ti rally iti panangrugi ti 49th ASEAN Summit.
Im-imbestigaren metten ti Commission on Human Rights ti maipagarop a panaglabsing ti nailian a pulisya iti panangarestar da iti 11 a protesters iti siudad ti Maynila.
Maipalagip a konkondenaren dagiti protesters iti panagturong iti pagilian ni US President Donald Trump a nagatendar iti ASEAN Summit.
Immunan nga inrakurak ti Philippine National Police (PNP) nga inarestar da laeng dagiti protesters gapu ta awan ti permit da tapno mangiyuswat ti rally ken gapu met iti reklamo ti sumagmamano a residente a naistorbo da iti grupo.












